Aftur til 
Vís undanfarnu úrslit
Spinachia spinachia
Strentingur er langur og klænur, tjúkkastur við gotið. Frá eygunum út í gronina er umleið tað sama sum hæddin á kroppinum, har hann er hægstur. Gotfjøðurin situr mest sum beint undir ryggfjøðurini, og fjaðrarnar eru nærum eins til støddar. Sporlið er heilt klænt og endar í einum lítlum, avrundaðum sterti. Á bakinum eru 14-17 týðiligir og spískir píkar frá ryggfjøðurini fram móti nakkanum. Ein píkur er beint framman fyri gotfjøðurina, og búkfjaðrarnar eru smáar og hava ein lítlan pík. Høvdið er langt og spískt. Kjafturin er lítil, upprendur. Hann hevur undirbit. Ein „kjølur“ er mitt eftir bakinum og ein á hvørji lið, og tí er hann í tvørskurði nærum fimmkantaður.
Strentingur er frá Bretagne um Bretsku oyggjarnar til Føroya. Frá Tromsø suður til Danmarkar og inn í Eystarasalt.
Stødd
Strentingur verður upp í 22 cm langur. Undir Føroyum verður hann neyvan størri enn 16,5 cm.
Dýpi
Strentingur er inni við land, í taranum.
Litur
Eftir umstøðunum er hann brúnligur ella grønligur. Dimmar tvørstrikur eftir síðunum. Hann er grønhvítur undir búkinum.
Eyðkenni
Nógvu píkarnir á bakinum og langa kropsskapið.
Týdningur
Strentingur hevur ikki vinnuligan týdning.
| Før: | Strentingur |
| Lat: | Spinachia spinachia |
| Dan: | Tangsnarre, Vejrfisk |
| Eng: | Sea stickleback, Fifteenspined stickleback |
| Fin: | Vaskikala |
| Fra: | Epinoche de mer |
| Ita: | Spinarello marino |
| Ned: | Zeestekelbaars, Zee paddesteker |
| Nor: | Tangstikling |
| Pol: | Pocierniec |
| Por: | Espinhoso |
| Rus: | Morskaja koljoška, Dlinnorylaja koljuška |
| Spa: | Espinoso |
| Sve: | Tångspigg, Tångsnipa |
| Týs: | Seestichling, Fünfzehnstachliger Stichling |
