Aftur til 
Vís undanfarnu úrslit
Pterycombus brama
Silvurbramafiskur er høgur og tunnur fiskur. Kropshæddin er um helvtina av standardlongdini. Hann hevur eina ryggfjøður, ið er serliga høg. Hon gongur av nakkanum aftur í klingruna. Gotfjøðurin byrjar undir uggafjaðrafestinum og gongur aftur í klingruna. Eisini hon er høg. Rygg og gotfjøðurin kunnu leggjast í eina foyru, so tær eru fjaldar. Hann hevur langar uggafjaðrar, ið koma umleið aftur á hálvan fiskin, smáar búkfjaðrar, stóran, spískan og sýldan stert við nakað longum stertafjaðrum. Hann hevur lítið høvd við stuttari gron og rundligum umhvarvi. Hann hevur stór eygu, ið sita frammarlaga á gronini, stóran, upprendan kjaft. Strikan er sjónlig á smáum fiskum, men er burtur á stórum fiskum. Hann hevur rísna roðslu.
Undir Íslandi, Føroyum og Norðurnoregi til Vesturafrika tvørtur um Atlantshavið til Meksiflógvan og Nova Scotia. Í Skagerrak og norðara parti av Norðsjónum.
Stødd
Silvurbramafiskur verður upp í 55 cm langur, men er vanliga minni enn 40 cm.
Dýpi
Hann er uppsjóvarfiskur á víðum havi, úr 25 metra dýpi niður á 300 metra dýpi. Onkuntíð sæst hann inni við land.
Litur
Hann er silvurlittur við svørtum undirliti. Rygg- og gotfjøður eru svartar fremst, verða líðandi mest sum gjøgnumskygdar aftast.
Eyðkenni
Kropsskapið. Høvuðumhvarvið. Stóru eyguni. Gronin framman fyri eyguni er umleið so long sum eygnasteinstvørmátið. Liturin og fjaðralongdirnar.
Týdningur
Silvurbramafiskur hevur lítlan týdning í fiskivinnuni og ongan her hjá okkum.
| Før: | Silvurbramafiskur |
| Lat: | Pterycombus brama |
| Azo: | Xaputa-borboleta |
| Dan: | Sølvbrasen |
| Eng: | Rough pomfret, Atlantic fanfish |
| Fra: | Poisson-éventail atlantique |
| Ísl: | Silfurbrami |
| Nor: | Sølvbrasme |
| Spa: | Voladora |
| Sve: | Fengömmare |
| Týs: | Silberbrassen |
| USA: | Atlantic fanfish |
Altjóða havrannsóknarstovnurin ICES kunngjørdi í dag nýggjastu ráðgevingina fyri hýsu og upsa í føroyskum havøki. Ráðgevingin byggir á nýggjastu stovnsmetingarnar av hesum fiskastovnum. ICES mælir til, at veiðan av hýsu…
Rannsóknarskipið Jákup Sverri er júst liðugur árliga merkingartúrin. Í ár var dentur lagdur á at merkja fisk á Føroyabanka, tí nú er aftur væl at fáa av toski. Eisini er…
Rannsóknarskipið Jákup Sverri er júst liðugur við árligu yvirlitstrolingina á djúpum vatni kring Føroyar, har 51 hál á ein tíma vórðu tikin. Á túrinum vórðu skrásett 88 ymisk sløg av…
Mest loyvda veiða í 2024 lækkar munandi fyri norðhavssild og nakað fyri makrel, men hækkar nakað fyri svartkjaft. Makrelur Tilmælið fyri makrel er 739.386 tons fyri 2024, sum er ein…
