Reyðsprøka

Ymiskt er, hvussu reyðsprøka veksur ymsastaðni undir Føroyum. Samanborið við onnur sjóøki, veksur reyðsprøkan undir Føroyum lutfalsliga skjótt. Reyðsprøka verður í mesta lagi um 100 cm long.

Reyðsprøka veksur uml. 10-15 cm um árið til hon gerst kynsbúgvin sum 3 ára gomul. Hareftir veksur hon uml. 3-5 cm árliga til hon er um 12 ár. Tá avtekur vøksturin rættiliga skjótt. 4 ára gomul reyðsprøka er um 40 cm og 10 ára gomul um 56 cm. Kanningar inni við land hava víst, at reyðsprøkan sama árið, sum hon er gýtt, er 3-9 cm til longdar.

Aldurin hjá reyðsprøku verður staðfestur við at telja árringar í nytrunum. Aldurin verður lisin av heilari nytru, sum hevur ligið á bloti í vatni í minst eitt samdøgur. Á henda hátt gerast árringarnir sjónskari og lættari at lesa.

Í miðal gýtir helvtin av reyðsprøkuni fyrstu ferð umleið 3 ára gomul; tá er hon um 35 cm til longdar.

Gýtingartíðin hjá reyðsprøku er frá februar til apríl. Reyðsprøka gýtir víða um á Landgrunninum. Gýtandi reyðsprøka er fingin norðan-, eystan- og vestanfyri. Dýpið, har gýtingin fer framm, er á umleið 100 m. Ongin gýting er inni á firðunum.

Reyðsprøkan heldur sær á grunnum vatni inni á firðum, víkum og sundum tey fyrstu 3 árini. Um 4 ára aldur leitar hon út á Landgrunnin, út á 200 m dýpi. Merkiroyndir undir Føroyum hava víst, at tann vaksna reyðsprøkan ferðast rættiliga víða um Landgrunnin, men um samband er við onnur havøki, er enn óvist. Nevnast skal í hesum sambandi, at reyðsprøkur merktar undir Íslandi eru fingnar aftur m.a. við Hetland, Norðurnoreg og í Barentshavinum heilt inn í Hvítahavið, so reyðsprøka kann ferðast víða.

Umrokningartalva út frá støddarbólkum. Virðini byggja á tøl fyri árini 2014-2022. Aftasta kolonnan sigur, hvussu stórur partur av fiskinum í ymsu støddarbólkunum væntandi hevur gýtt minst einaferð. Á landingarmiðstøðunum kring landið verður reyðsprøka bólkað í hesar tríggjar støddarbólkar, alt eftir vekt.