Murrikrutt

Murrikrutt er klænri fiskur enn fleiri onnur krutt. Tað hevur klæna klingru. Tvær naddaklæddar strikur eru, niðara er mitt eftir síðuni og ovara millum hesa strikuna og ryggfjaðrarnar. Niðara strikan bogar eitt sindur niður yvir uggafjøðurina, og á henni eru 46-48 roðslur. Síðan undir niðaru strikuni er sett við tøttum, skáksettum beinplátum, í faldum við týðiligum og skørpum kantum. Murrikrutt hevur tvær ryggfjaðrar, ið standa tætt saman, tann fremra er minni, men hægri. Aftara er long og heldur lág. Tað hevur eina gotfjøður á stødd sum aftara ryggfjøður. Niðastu teinarnir í uggafjaðrunum eru berir. Tað hevur smáar búkfjaðrar. Sterturin er miðalstórur og er nakað útbogin aftan. Gronin er styttri enn eygnatvørmátið. Tveir píkar eru á gronini og fýra smáir á kápuni, men ongin á skallanum. Høvuðlongdin er umleið 25-27% av standardlongdini. Kallfiskarnir hava stóra sinu.