Huldukrutt

Huldukrutt er høvuðstórur fiskur, høvdið er um 30% av heildarlongdini. Hægst er huldukrutt fremst á bulinum, mjækkar aftureftir, og klingran er kløn. Tað hevur stór eygu ovarlaga í heysinum, lítlan kjaft, og kjaftklovin er týðiliga frammanvert eyguni. Huldukrutt hevur slætta skræðu og er roðsluleyst. Ein-tveir naddar eru við eyguni og tveir á nakkanum. Tað hevur eina ryggfjøður, av nakkanum aftur í klingruna og eina gotfjøður, frá gotinum aftur í klingruna, báðar eru lágar framman og hægri aftan. Huldukrutt hevur stórar uggafjaðrar, sum røkka umleið aftur á hálvan fiskin, smáar búkfjaðrar og stóran, mjáan stert.