Toskur

Í mun til tosk á Landgrunninum er toskurin á Føroyabanka ljósari á liti, sporlið er breiðari og lukturin verður sagdur at vera øðrvísi.

Vøksturin á toski er tengdur at økinum hann livir í. T.d. veksur toskur á Føroyabanka skjótari enn toskur á Landgrunninum.

Toskur er ógvuliga støðufastur fiskur, við tað at hann nærum ikki ferðast til onnur havøki. Merkingarroyndir av bæði bankatoski og toski á Landgrunninum vísa, at nærum ongin ferðing er teirra millum. Harafturat eru bert 14 toskar av umleið 10000 merktum toskum í føroyskum øki fingnir aftur uttan fyri føroyska økið.

Toskur er eisini støðufastur tá tað veldst um gýtingarøki og føðiøki (har toskur livir, tá hann ikki gýtir), soleiðis at tann einstaki toskurin brúkar sama gýtingarøki og sama føðiøki ár undan ári. Eftir gýting fer toskur “heimaftur”, har hann heldur seg frá mai-juni og til einaferð í januar-februar komandi ár.