Toskur á Føroyabanka

Bankatoskurin veksur munandi skjótari enn toskurin á Landgrunninum og toskur á flestu støðum í Norðuratlantshavi; longu sum 3 ára gamal er hann í miðal um 69 cm til longdar, 5 ára gamal 83 cm og 8 ára gamal 97 cm til longdar.

Aldurin hjá toski verður staðfestur við at telja árringar í nytrunum. Aldurin verður lisin av skornari nytru, sum er stoypt inn í ein svartan plastikkbkokk og síðani skorðin ígjøgnum kjarnuna á nytruni. Nytran á toski er lutfalsliga stór.

Í miðal gýtir helvtin av bankatoskinum fyrstu ferð umleið 3 ára gamal; tá er hann um 69 cm til longdar.
Tað er sostatt ongin munur á, hvussu gamal toskurin á Landgrunninum og toskurin á Føroyabanka er, tá hann gerst kynsbúgvin, men tann skjóti vøksturin ger, at toskurin á Føroyabanka er nógv størri, tá hann verður kynsbúgvin.

Toskurin á Føroyabanka gýtir heldur seinni enn toskurin á Landgrunninum. Gýtingartíðin er frá mars til mai. Høvuðsgýtingin er í fyrru helvt av apríl. Gýtingarøkið er gult og uppvakstrarøkið brandgult.

Toskur á Føroyabanka er ógviliga støðufastur, við tað at hann nærum ikki ferðast av Bankanum. Merkingarroyndir av bæði bankatoski og toski á Landgrunninum vísa, at nærum ongin ferðing er teirra millum.

Vanligi liturin er grábrúnur, gulgrønur um bakið og síðurnar, settur við tøttum, dimmum, gráligum ella brúnligumblettum. Toskurin á Føroyabanka er tó ljósari á liti enn toskurin á landgrunninum. Undir búkinum er hann ljósur, hvítur ella gráhvítur. Men hann hevur eisini aðrar litir, t.d. dimmbrúnur (flotfiskur), reyðbrúnur (í taranum). Strikan er hvít/ gráhvít.