{{currentPage * pageSize + 1}} - {{pageSize * (currentPage + 1) > numberOfResults ? numberOfResults : pageSize * (currentPage + 1)}} úrslit av {{numberOfResults}}
Einki úrslit

Sild og svartkjaftur norðanfyri

Jákup Sverri, túrur nr. 2320

Tíðarskeið: 4-16/5 2023

Ábyrgd: Sólvá Káradóttir Eliasen

Endamál: Endamálið við túrinum var at kanna nøgdir og aldurssamanseting av sild og svartkjafti í havøkinum norðan fyri Føroyar. Ekkókanningin er partur av felags kanningum av norðhavssild og svartkjafti, sum eru skipaðar undir “ICES Working Group of International Pelagic Surveys” (WGIPS), saman við skipum úr Noregi, Íslandi, Bretlandi og ES (Danmark).

Samandráttur

Sild var at síggja í mestsum øllum kanningarøkinum hjá Jákupi Sverra, sum í ár var væl norðari enn undanfarin ár  (Mynd 1). Tað var einans inn móti íslendska landgrunninum og í útnyrðingshorninum og landsynningshorninum av kanningarøkinum at lítið var at síggja. Aldursgreiningin av sildini vísir, at tað enn er 2016 árgangurin sum er bulurin í vaksna stovninum (Mynd 2).

Svartkjaftur var at síggja í eystasta partinum av kanningarøkinum (Mynd 1), har sjógvurin eisini er lutfalsliga heitari enn vestanfyri. Meirilutin av svartkjaftinum vóru 2 ella 3 ára gamlir (Mynd 3).

Um samlaðu nøgdina av sild og svartkjafti ber einki til at siga, fyrrenn tølini frá øllum luttakandi skipunum verða viðgjørd um miðjan juni. Umframt sildakanningarnar varð skurður N eisini tikin (Mynd 4).

Mynd 1 Útbreiðsla hjá sild og svartkjafti á túri 2320, 5-14/5-2023.
Mynd 2 Longdar- og aldursbýti hjá sild á túri 2320, 5-14/5-2023.
Mynd 3 Longdar- og aldursbýti hjá svartkjafti á túri 2320, 5-14/5-2023.

Um túrin

Vit fóru av Havnini á middegi hósdagin 5. mai. Farið var beint á Skurð N (Mynd 4) sum varð tikin áðrenn sildakanningarnar byrjaðu. Leygarmorgunin 7. mai komu vit á ætlaðu sildakanningarkósina og byrjaðu at gera kanningar. Ekkóskrift av sild og svartkjafti undir skipinum varð mátað við ekkóintegratori. Øll tøl vórðu goymd á teldu og viðgjørd við forritinum LSSS. Við hesum forritinum kann metast um nøgdina av sild og svartkjafti á sigldu leiðini. Eisini vóru umhvørviskanningar, við umleið 60 fjórðingum millum, gjørdar við CTD-máting (hiti/salt) og WP-2 prøva (djóraæti). Trolið varð koyrt út tá skrivt var á ekkoloddinum.

Veðrið var gott mestsum alla túrin og kanningarnar vóru ótarnaðar. Fríggjakvøldið 12. mai var nakað av vindi, so troling var ikki ráðilig, men lítið var at síggja á ekkoloddinum, so eingin orsøk var at koyra trolið út. Silda- og svartkjaftakanningarnar vóru lidnar sunnudagin 14. mai og vit vóru aftur á Havnini týsmorgunin 16. mai. Tilsamans vóru 17 trolstøðir og 22 umhvørvisstøðir tiknar og sigldir vóru umleið 2050 fjórðingar.

Mynd 4 Hiti og salt á skurði N. Norðurendin er í høgru síðu og suðurendin í vinstu síðu.

Prøvatøka

Veiðan varð viðgjørd sambært kanningarætlanini og Sýnishondbókini. Tal av longdarmátingum og aldursgreiningum av sild og svartkjafti síggjast á Mynd 2 og 3.

Reiðskapur                  

Flótitrolið MultPelt832 til trolkanningar – 45 mm meskavídd í posanum, 80 m breidlar og Twister Lemmar (4,5 m2 , 1650kg). Simrad EK80 ekkólodd á lorikjøli til at skráseta ekkóskriftina á leiðini. CTD-sonda við vatnfløskumog WP2- glúpur til umhvørviskanningar.

Viðmerkingar

Silas Olofson var við á túrinum. Hann gjørdi m.a. fuglateljingar og skrásetti gott 20 fuglasløg kring skipið, skrásetti hvørja føði ymsu fuglarnir taka og stóð eisini fyri at goyma livandi fiskar í kari á dekkinum til at hava heim við til Sjósavnið.

Umframt vanligu lívfrøðiligu prøvatøkuna av sild, vórðu eisini tikin ílegusýni av 90 sildum til samanberandi kanningar við rannsóknarstovnarnar í grannalondunum. Gott 100 svartkjaftar vórðu frystir til íslendingar at gera ílegukanningar. Úrslitini frá hita-, salt- og djóraætismátingum verða viðgjørd í felags túrfrágreiðing, sum verður skrivað um hálvan juni, tá eisini vísitøl frá øllum luttakandi skipunum verða gjørd til stovnsmetingina av norðhavssild.

Fólk við frá Havstovuni

Sólvá Káradóttir Eliasen (kanningarleiðari), Leon Smith, Poul Vestergaard, Gunn í Horni Hansen.

Túrfrágreiðingar

  • Sild og svartkjaftur norðanfyri

    Túrfrágreiðing Jákup Sverri, túrur nr. 2416 og 2417 (Skurður N) Tíðarskeið: 24/4-4/5 2024 Ábyrgd: Sólvá Káradóttir Eliasen Endamál: Endamálið við túrinum var at kanna nøgdir og aldurssamanseting av sild og […]

    Les meir

  • Svartkjaftakanningar sunnanfyri

    Túrfrágreiðing Jákup Sverri, túrur nr. 2412 Tíðarskeið: 20/3-5/4 2024 Ábyrgd: Jan Arge Jacobsen Endamál: At kanna nøgdirnar av svartkjafti í økinum sunnan fyri Føroyar og í norðara parti av gýtingarøkinum. […]

    Les meir

  • Yvirlitstroling – djúpt

    Jákup Sverri, túrur nr. 2346 Tíðarskeið: 28/9-07/10 2023 Ábyrgd: Petur Steingrund Endamál: Høvuðsendamálið við túrinum er at kanna botnfisk á djúpum leiðum. Hetta er ein yvirlitstroling fyri djúpvatnsfisk í føroyskum […]

    Les meir

Viðkomandi tíðindi

  • Svartkjaftastovnurin væl fyri

    Vísitalið fyri gýtingarstovnin av svartkjafti hækkar við 31% frá í fjør. Tað vísa felags ekkókanningarnar, ið vórðu gjørdar sunnanfyri í føroyskum, bretskum og írskum sjógvi síðst í mars mánað 2024.…

    Les meira

  • Jákup Sverri liðugur við sildakanningar

    Leygarkvøldið 4. mai kom Jákup Sverri aftur av árligu silda- og svartkjaftakanningunum norðanfyri. Í kanningarøkinum hjá Jákupi Sverra var lutfalsliga lítið at síggja av sild. Norðhavssild var at síggja í…

    Les meira

  • Svartkjaftakanningar sunnanfyri

    Ekkókanningar av svartkjafti sunnan fyri Føroyar og suður í bretskan og írskan sjógv vóru gjørdar í tíðarskeiðinum 20. mars til 5. apríl 2024. Ekkóvirðir (nøgd) av svartkjafti, Jákup Sverri 20/3-5/4…

    Les meira

  • Lítið av gulllaksi at fáa á djúpum vatni

    Rannsóknarskipið Jákup Sverri er júst liðugur við árligu yvirlitstrolingina á djúpum vatni kring Føroyar, har 51 hál á ein tíma vórðu tikin. Á túrinum vórðu skrásett 88 ymisk sløg av…

    Les meira