Fingið merktan fisk

Havið

Havið Hiti og salt Rák Havsúrgan Tíðarrøðir

Lívið í havinum

Lívið í havinum Fiskur Havsúgdjór Sjófuglur Djóraplankton Plantuplankton Tíðarrøðir

Tilmæli

Tilmæli Tilmæli frá Havstovuni Tilmæli frá ICES Um stovnsmeting

Fiskalisti

Tíðindi

Um Havstovuna

Um Havstovuna Samband Jákup Sverri Starvsfólk Verkætlanir Sæð okkurt spennandi? Ofta spurt Búmerki

Hvussu kunnu skipsdagbøkur og innvigingartøl brúkast í stovnsmeting av reyðsprøku og tungu?

Endamálið við hesi verkætlan er at útgreina og lýsa, hvussu taltilfar frá skipsdagbókum og innvigingarskipanum á landingarmiðstøðum kann nýtast í framtíðar stovnsmeting av reyðsprøku og tungu, sum stuðlandi vísutøl fyri stovnsstødd og býti, tá ið taltilfar, so sum aldursbýtið í veiðuni (catch-at-age) og index frá árligu yvirlitstrolingunum, ikki eru nøktandi.

Seinastu fimm árini hevur Havstovan arbeitt við verkætlanini “Útbreiðsla, lívfrøði og fiskiskapur eftir reyðsprøku og tungu í føroyksum sjógvi”. Í hesum arbeiðium vórðu fyrstu stovnsmetingarnar av reyðsprøku og tungu gjørdar við aldursgrundaðum stovnsmetingarleistum. Hetta kravdi tó sera tíðarkrevjandi og kostnarðarmikla prøvatøku. Slík prøvatøka fellur uttan fyri fíggjarliga rammuverkið hjá Havstovuni og er tískil ikki haldfør loysn til regluligar stovnsmetingar av hesum fiskasløgum framyvir.

Samstundis hevur Havstovan arbeitt við pilotverkætlanini “Innvigingartøl til stovnsmetingar“, har endamálið var at miðsavna innsavnaðar fiskavektir frá útvaldum landingarmiðstøðum og meta um, hvørt hesar dátakeldur kunnu nýtast sum stuðulstilfar í stovnsmetingarhøpi. Høvðusdenturin í pilotverkætlanini varð lagdur á tosk og longu, men tó bleiv nakað av taltilfari um reyðsprøku og tungu eisini fingið til vega (sí partin í pilotverkætlanini, sum er um reyðsprøku og tungu her).

Útgreiningar av hesum reyðsprøku og tungu innvigingardátum, samanbornar við úrslit frá omanfyri nevndu verkætlan, vístu, at innvigingartølini kunnu nýtast til at greina vektarsamansetingina í veiðuni og menna vektarbýtið á aldur (weight-at-age). Í framhaldsverkætlanini “Innvigingartøl víðarimenning“, sum júst er byrjað, verður enn meira taltilfar miðsavnað í tilsnikkaðan dátagrunn á Havstovuni, frá enn fleiri landingarmiðstøðum, soleiðis at dátugrundarlagið fer at fevna um nærum alla veiðuna av reyðsprøku og tungu.

Henda verkætlanin fer at samantvinna úrslit og dátur frá nevndu verkætlanum við tí endamáli at útgreina, í hvønn mun veiða upp á roynd (CPUE) frá skipsdagbókum, saman við vektarbýti á aldur (weight-at-age) frá innvigingardátum, kunnu nýtast sum haldført grundarlag undir stovnseftirliti og stovnsmetingum av reyðsprøku og tungu, og hvussu hetta møguliga kann skipast regluliga framyvir, uttan tørv á serligari sýnistøku frá Havstovuni.