Fingið merktan fisk

Havið

Havið Hiti og salt Rák Havsúrgan Tíðarrøðir

Lívið í havinum

Lívið í havinum Fiskur Havsúgdjór Sjófuglur Djóraplankton Plantuplankton Tíðarrøðir

Tilmæli

Tilmæli Tilmæli frá Havstovuni Tilmæli frá ICES Um stovnsmeting

Fiskalisti

Tíðindi

Um Havstovuna

Um Havstovuna Samband Jákup Sverri Starvsfólk Verkætlanir Sæð okkurt spennandi? Ofta spurt Búmerki

Norðhavssildin væl í holdum seinnu árini

Síðani 2005 hevur norðhavssildin sum heild verið væl í holdum um veturin og hevur samstundis havt størri rogn. Hetta er mett at vera tengt at, at beitistíðin er longd út á heystið.

Norðhavssildin er regluliga blivin kannað seinastu 25 árini – bæði við rannsóknarferðum, og tá kanningar eru gjørdar av landaðum fiski í Føroyum, Íslandi og Noregi. Ein umfatandi greining av hesum kanningum varð herfyri útgivin í Frontiers of Marine Science.

Tá norðhavssild hevur gýtt fram við norsku strondini í februar-mars, er hon rak og vigar lutfalsliga lítið. Um summarið og út á heystið, tá nógv æti er í Norskahavinum, fitnar hon og byggir upp sínar goymslur, soleiðis at hon kann gýta aftur árið eftir. Sostatt er sildin feitast einaferð seint á árinum. Ymist er tó bæði hvussu feit hon er, tá hon gevst at eta um heystið, og nær á heystinum hon er feitast. Í greinini eru hesi viðurskifti lýst við atliti at broytingum millum ár.

Fyrstu árini sóust stórar broytingar bæði í longd og vekt hjá sildini, men síðani uml. 2005 hevur sildin megnað at halda seg javnt væl í holdum móti vetri, hóast at sildin í nøkrum tíðarskeiðum hevur verið lutfalsliga stutt. Serliga er tað størsta og elsta sildin, sum hevur verið væl fyri. Harafturat eru rognini hjá størstu sildini vaksin longu áðrenn jól seinnu árini; til samanberingar var tað áðrenn 2005 vanligt, at rogn og sil ikki fóru at vaksa av sonnum fyrr enn eftir ársskiftið. Broytingar eru eisini í fiskiskapinum – fiskiskapurin seint um summarið og heystið hevur flutt seg í ein útsynning frá norsku strondini, soleiðis at mesti fiskiskapurin hesa árstíðina síðani 2010 hevur verið millum Ísland og Føroya.

Síðstu 25 árini eru eisini broytingar skrásettar í umhvørvinum – millum annað, at smátt djóraæti í størri mun er vorðið tøkt sum føði út á heystið norðan fyri Føroyar. Hetta bendir tí á, at norðhavssildin hevur megnað at lagað seg til broyttu umstøðurnar og soleiðis etur longri út á heystið, enn vanligt var fyrr, tá sildin vanliga fór í vetrardvala út fyri norsku strondini longu tíðliga um heystið.

Eydna í Homrum