Vís undanfarnu úrslit
Grønlandstussi
Himantolophus groenlandicus
Kropsskapið er flatt og nærum eins høgt og langt. Eina ryggfjøður hevur hann aftast móti klingruni. Eina gotfjøður hevur hann beint undir ryggfjøðurini. Báðar hava fýra grovar teinar og eru eins til støddar. Uggafjaðrarnar eru smáar og eru mitt á síðunum og ongar búkfjaðrar. Táknaopini eru beint aftan fyri uggafjaðrarnar. Sterturin hevur seks grovar teinar. Ein høg og tjúkk mastur stendur upp úr enninum, mitt millum tey smáu eyguni. Masturin er um 50% av standardlongdini. Stórur skúvur er ovast á mastrini. Grønlandstussi hevur stórt høvd og stóran kjaft. Á kroppinum eru nakrir knubbutir vøkstir, líkir gjari. Tveir nakað spískir píkar standa upp úr enninum oman fyri eyguni. Eftir bakinum eru nakrir spískir naddar.
Útbreiðsla
Grønlandstussi er sjáldsamur fiskur. Hann er fingin sunnanfyri í føroyskum sjógvi. Hann er eisini fingin úti fyri Noregi, Grønlandi og Íslandi, við Asoroyggjarnar, Nova Scotia, Bermuda, Surinam og Vesturafrika. Í Kyrrahavinum er hann úti fyri Japan og teivan til Nýsælands, og er eisini í Indiahavinum.
Stødd
Kvennfiskar verða upp í 60 cm langir. Kallfiskar verða ikki longri enn 4 cm. Mátini eru standardmát. Kallfiskar eru ikki sæddir at vera fastgrónir uppi á kvennfiskunum og mugu tí metast at vera fríttsvimjandi.
Dýpi
Grønlandstussi er úr 100 metrum niður á 830 metrar, helst eisini djúpari.
Litur
Hann er grásvartur.
Eyðkenni
Runda skapið. Stongin og skúvurin upp úr enninum.
Týdningur
Hann hevur ikki vinnuligan týdning.
Nøvn á fiski á øðrum máli
| Før: | Grønlandstussi |
| Lat: | Himantolophus groenlandicus |
| Dan: | Reinhardts fakkelangler |
| Eng: | Atlantic footballfish |
| Fra: | Football atlantique |
| Ísl: | Lúsifer |
| Jap: | Chôchin-ankô |
| Pol: | Maszkara |
| USA: | Atlantic footballfish |
Vit viðmæla
Viðkomandi tíðindi
Framvegis nógv av toski á Føroyabanka, sum tó er rak í mun til onnur ár
Árligu vár-yvirlitstrolingarnar á Føroyabanka vóru gjørdar tann 13.-17. mars 2024 við rannsóknarskipinum “Jákup Sverra”. Einans 13 trolstøðir av 29 vórðu kannaðar í ár, av tí at Jákup Sverri fekk tekniskar…
Eitt vet meira av toski á føroyska landgrunninum
Rannsóknarskipið “Jákup Sverri” hevur gjørt ta árligu váryvirlitstrolingina á føroyska landgrunninum, har 100 hál á ein tíma vóru tikin. Tað var framvegis sera lítið at fáa av toski, men kortini…
Virkið ”NFCS Northern Fish Cold Storage” vann lutakast
Týsdagin 19. desember 2023 var árliga lutakastið um 12.500 kr millum teirra, ið hava latið fiskamerki inn farna árið. Tað var virkið ”NFCS Northern Fish Cold Storage” í Klaksvík, sum…
Tilmæli 2024
Tann 12. desember 2023 lat Havstovan Fiskimálaráðnum tilmælið um fiskiskap eftir toski, hýsu og upsa í 2024. Í eini roynd at endurreisa toskastovnin á føroyska landgrunninum verður mælt til at…
