Vís undanfarnu úrslit
Íslandshávur
Apristurus laurussonii
Íslandshávur er smidligur hávur. Hann hevur stuttan bul, langt sporl. Úr tróni í got er styttri enn úr goti í stertaenda. Sterturin er ikki upprendur, men vísir beint aftur úr rygginum. Báðar ryggfjaðrarnar eru eins til støddar, smáar og lágar. Tann fremra situr aftan fyri miðjuna á fiskinum, hin aftara røkkur væl aftur um fremra enda á undirstertinum. Íslandshávur hevur smá táknaop. Tey aftastu sita uppi yvir uggafjaðrunum. Breiddin millum eyguni er um 2/3 av granarlongdini. Eygnaholurnar eru um 1/3 av granarlongdini. Andahol aftanfyri eyguni. Gronin er fløt, og kanturin millum yvir og undirheys er hvassur av trantinum til undir eyguni, haðani kanturin líðandi rundar aftur til táknaopini. Tenninar eru smáar, eini fimm røð í undirkjaftinum og fimm ella fleiri í yvirkjaftinum. Tað sær út, sum tanngarðurin er snúðraður. Hann er svartur inni í kjaftinum. Strikan er kám.
Útbreiðsla
Hann er úr hellingunum vestan fyri Írland til Íslands. Við Vesturafrika, Madeira og Kanariuoyggjar. Frá Massachussetts til Meksikoflógvan. Á okkara leiðum er hann fingin út av bankunum vestanfyri og við Bankaryggin.
Stødd
Vanliga longdin á honum er um 65-75 cm, og so langir verða helst eisini teir størstu íslandshávarnir.
Dýpi
Íslandshávur er á dýpum úr 50 m niður á 1500 m.
Litur
Hann er gráligur. Liturin fer eitt sindur í brúnligt ella myrkt reyðgrátt. Rendurnar á støku fjaðrunum eru svartar-blásvartar.
Eyðkenni
Íslandshávur er langur og klænur fiskur. Fremri endi á fremru ryggfjøðurini er aftan fyri miðjuna á fiskinum. Hann hevur fínar, blásvartar rendur á ómakaðu fjaðrunum, hevur stóra gotfjøður. Hann er eitt sindur bleytur, liðiligur.
Týdningur
Íslandshávur hevur ikki vinnuligan týdning.
Nøvn á fiski á øðrum máli
| Før: | Íslandshávur |
| Lat: | Apristurus laurussonii |
| Eng: | Iceland catshark, Brown catshark, Flathead cat shark |
| Fra: | Roussette d’Islande, Rousette de Madére |
| Ísl: | Gíslaháfur |
| Ned: | Ijslandse kathaai |
| Spa: | Pejegato de Madera, Pejegado de islandia, Pejegado marron o narigo, Pejegato de islandia, Pejegato marron o narigo |
Vit viðmæla
Viðkomandi tíðindi
Gráhávur – ein sjáldsamur gestur
Herfyri fekk Havstovan ein gráháv (Galeorhinus galeus) at kanna. Hávurin var fingin á línu við Suðuroynna. Hetta er triðja skráseting av gráhávi í føroyskum sjógvi. Tó er hetta fyrsti fiskurin,…
Lítið av gulllaksi at fáa á djúpum vatni
Rannsóknarskipið Jákup Sverri er júst liðugur við árligu yvirlitstrolingina á djúpum vatni kring Føroyar, har 51 hál á ein tíma vórðu tikin. Á túrinum vórðu skrásett 88 ymisk sløg av…
Fingið merktan skrubbháv
23. oktober 2017 fekk Havstovan ein merktan skrubbháv frá trolaranum Suðringi. Hesin skrubbhávur varð merktur í Spania 24. december 2014, á positión 43°40N og 04°24W. Dýpið var 1060 metrar. Hann…
Fingu stóra brugdu
Rannsóknarskipið Magnus Heinason fekk í august 2007 eina nærum 10 metrar langa brugdu í trolið. Hetta er úr Sjóvarmál 2011, les víðari her. Viðkomandi tíðindi
