Aftur til 
Vís undanfarnu úrslit
Centroscymnus coelolepis
Glíggjhávur er langur og rundligur fiskur, mjækkar móti endunum. Bulurin er eitt sindur tjúkkur, og fiskurin tykist fastur og tungur. Kvennfiskar hava tó ofta heldur stóran og kvapsutan búk. Hann hevur tvær smáar ryggfjaðrar, tann fremra er minni. Ryggfjaðrafestini eru umleið eins til longdar. Aftari endi á búkfjaðrunum kemur væl inn undir festið á aftaru ryggfjøður. Smáu píkarnir framman fyri ryggfjaðrarnar koma akkurát undan. Sterturin er um 22-23% av heildarlongdini. Skræðan er sett við smáum ’tonnum’, sum grovt sandpappír. Høvdið er stórt, um 20% av heildarlongdini. Hann hevur stutta gron, ið smalkar út í ein bleytan runding frameftir. Táknaopini eru smá, um hálvt eygnatvørmát. Hann hevur andahol á skák upp og aftur frá eyganum. Kjafturin er næstan beinur og er eitt vet breiðari enn longdin úr kjafti í trant. Tenninar eru ólíkar í kjaftunum báðum.
Glíggjhávur fæst í hellingunum og á slætta djúpa botninum sunnan fyri og vestan fyri Føroyar. Er annars undan Íslandi til Noregs, í Norðsjónum og suður til Senegal. Við Madeira, Asoroyggjar og á tindum og bankum úti í Alantshavinum. Í Vesturatlantshavinum er hann av Grandbanka til Kuba. Við Suðurafrika, Japan, Nýsæland og Avstralia.
Stødd
Glíggjhávur verður upp í 120 cm langur, møguliga enn longri.
Dýpi
Hann fæst vanliga á dýpi millum 800 m og 1500 m, men er annars frá umleið 300 m niður á 3600 m.
Litur
Hann er einlittur myrkabrúnur um allan kroppin. Hann er vakurt hvítur inni í kjaftinum.
Eyðkenni
Hvíti kjafturin og myrki liturin eyðkenna glíggjhávin. Hann hevur smáar ryggpíkar og smáar ryggfjaðrar. Kann minna um lítla hákelling, men hon hevur ikki píkar.
Týdningur
Glíggjhávur verður seldur á evropeisku fiskamarknaðunum til matna og livurin til bræðingar.
| Før: | Glíggjhávur |
| Lat: | Centroscymnus coelolepis |
| Azo: | Tubarão-português |
| Dan: | Portugisisk pighaj |
| Eng: | Portuguese dogfish, Portuguese shark, Siki |
| Fin: | Syvänne-piikkihai |
| Fra: | Pailona commun, Niger princes, Siki |
| Gri: | Kentroskymnos |
| Ísl: | Gljáháfur |
| Ita: | Centroscimno |
| Jap: | Marubara-yumezame |
| Nor: | Dypvannshå |
| Spa: | Pailona |
| Sve: | Pailonahaj |
| Týs: | Portugiesenhai |
Herfyri fekk Havstovan ein gráháv (Galeorhinus galeus) at kanna. Hávurin var fingin á línu við Suðuroynna. Hetta er triðja skráseting av gráhávi í føroyskum sjógvi. Tó er hetta fyrsti fiskurin,…
Rannsóknarskipið Jákup Sverri er júst liðugur við árligu yvirlitstrolingina á djúpum vatni kring Føroyar, har 51 hál á ein tíma vórðu tikin. Á túrinum vórðu skrásett 88 ymisk sløg av…
23. oktober 2017 fekk Havstovan ein merktan skrubbháv frá trolaranum Suðringi. Hesin skrubbhávur varð merktur í Spania 24. december 2014, á positión 43°40N og 04°24W. Dýpið var 1060 metrar. Hann…
Rannsóknarskipið Magnus Heinason fekk í august 2007 eina nærum 10 metrar langa brugdu í trolið. Hetta er úr Sjóvarmál 2011, les víðari her. Viðkomandi tíðindi
