19. Juli. 2012

Interkalibrering eystan fyri Ísland

 

Makrelkanningar, sum eru skipaðar sum felagskanningar saman við íslendingum og norðmonnum, eru júst lidnar. Endamálið við kanningunum er at kanna nøgdinar og útbreiðsluna av makreli um summarið, tá hann er í norðurhøvum fyri at finna sær føði.

 

Í sambandi við kanningarnar møttust rannsóknarskipini í íslendskum sjógvi til interkalibrering.

 

Interkalibreringin skal tryggja, at endaligu úrslitini av makrelkanningunum hjá øllum skipunum kunnu samanberast og setast saman í eina felags frágreiðing.

 

Mánadagin t. 16. juli møttust Christin í Grótinum úr Føroyum, Árni Friðriksson úr Íslandi og G.O.Sars og Brennholm úr Noregi eystan fyri Ísland.

 

Øll skipini gjørdu fleiri tóv í sama øki samstundis. Tóvað varð í somu kós, og tað var 1 km millum skipini. Veiðan í hvørjum háli varð mátað, kannað og skrásett.

 

Úrslitini frá interkalibreringini verða samanborin og granskað nærri í heyst.

 

Mynd: Leif Nøttestad