Rundmunnar

Myxiniformes

Í flokkinum rundmunnar eru tey mest upprunaligu fiskasløgini. Hetta eru fiskasløg, sum hava verið í havinum í 500 milliónir ár og eru har enn. Tað eru nú á døgum bert hóparnir súgállar og súgarar eftir.

Tað, sum eyðkennir rundmunnar, og sum skilir teir frá tvørmunnum, er, at teir hvørki hava kjaftbein ella kjálkabein. Teir hava fleiri røð av skavitonnum, ið kunnu flytast inni í kjaftinum. Rundmunnar hava hvørki ugga- ella búkfjaðrar, skræðan er ógvuliga slímut, og raðið er lítið ment. Rundmunnar hava állaskap.

Tað eru bert tey bæði sløgini av rundmunnum súgállur og súgari í Føroyum.