01. Mars. 2012

25 ára starvsdagur á Havstovuni

 

Tann 1. mars í ár hevur Eilif Gaard, sum nú er stjóri á Havstovuni, arbeitt á stovninum í 25 ár. Eilif er útbúgvin lívfrøðingur við Cand. Scient heiti frá Odense universiteti í 1986, og 1. mars 1987 varð hann settur í starv sum granskari á Fiskirannsóknarstovuni, sum Havstovan tá æt. 

 

Hann hevur í sínum starvi serliga kannað gróður og plankton (æti), sum eru grundarlagið undir mestsum øllum øðrum livandi í havinum. Við síni gransking hevur hann ávíst stórar broytingar í gróðrinum á føroyska landgrunninum og verið við til at vísa, hvussu stóran týdning hesar broytingar hava fyri fleiri av okkara gagnfiskastovnum og annað livandi, sum sjófugl.

 

Í 2001 vann hann sær doktaraheiti (Doctor philos.) við universitetið í Tromsø fyri hesa gransking. Tá Hjalti í Jákupsstovu gavst vegna aldur, varð Eilif settur stjóri á Havstovuni 1. mars 2010.